The Knight's Tale
Folio 25v
37 of 42 folios
The thrid bar wyth hym his bow turkeys
Of brend gold was the cas and eke the harneys
And ryden forth a paas wyth sorweful chere
Toward the groue as ye shal aftyr heere
2035
The noblest of the Grekes that ther were
Vpon hir shuldres cariden the bere
Wyth slak paas and eyen red and wete
Thurgh out the citee by the maistre strete
That sprad was al wyth blak and wondyr hye
2040
Ryght of the same is the street y wrye
Vpon the ryght hond went the olde Egeus
And on that other syde duke theseus
Wyth vesselles in hir hond of gold ful fyne
Al ful of hony melk and blood and wyne
2045
Eke palamon wyth ful gret compaignye
And aftyr that came woful Emelye
Wyth fire in hond as was that tyme the gyse
To do the office of funeral seruyse
¶ Heigh labour and ful gret apparayllynge
2050
Was as the seruyse and the firemakynge
That wyth his grene top the heuen raught
And twenty fadme of breed the armes straught
This to seyn the bowes were so brode
Of stree first ther was leyde many a lode
2055
But how the fir was maked vpon heighte
Ne eke the names how the trees heighte
As ook fir byrche aspe alder holm popeler
Wilow Elme plane ash box Cestayn lynde laurer
Mapil thorne beche hasil Ewe whippultre
2060
How thei weren felde that shal not be tolde for me .
Ne how the goddes runnen vp and doun
Desherited of hir habitacyoun
In which thei woneden in rest and pees
Nimphes phawnes and amadrides
2065
Ne how the bestes and the briddes alle
Fledden for feere whan the wod was falle
Ne how the ground a gast was of the lyght
That was not wont to seen the Sonne bryght
Ne how the fyre was couched first wyth stree