The Second Nun's Tale
Folio 85r
7 of 16 folios
Ualerian as ded fil doun for drede
205
Whan he him say and he vp hente him tho
And on his book ryght thus he gan to rede
O. lord. o. feith. o. god wyth oute mo
O. cristendom and fader of alle also
Abouen alle and ouer alle euery where
210
Thise wordes al wyth gold I wryten were
Whan this was rad than seyde tholde man
Leuestow this thing or no sey .ye. or nay
I leue al this thing quod valeryan
For sother thing than this I dar wel say
215
Vndyr the heuene no wight thinke may
Tho vanyshed this olde man he nyste where
And pope vrban him cristned ryght there
Ualerian goth hoom and fynt Cecilie
In wyth his chambre wyth an aungel stonde
220
This aungel had of roses and of lilie
Corounes two the which he bar in honde
And first to Cecilie as I vnderstonde
He yaf that on and after gan he take
That other to valerian hir make
225
Wyth body clene and wyth vnwemmed thoght
Kepeth ay wel thise corones quod he
Fro paradyse to you haue I hem brought
Ne neuer mo ne shal thei roten be
Ne lese hir soote sauour tristeth me
230
Ne neuer wyght shal seen hem wyth his eye
But he be chaste and hate vileynye
And thou valeryan for thou so sone
Assentedest to good counseil also
Sey what the list and thou shalt han thi bone
235
I haue a brother quod valerian tho
That in this world I loue no man so
I pay yow that my brother may haue gace
To knowe the trouthe as I do in this place