The Second Nun's Tale
Folio 84v
6 of 16 folios
Cecilie answerde anoon ryght in this wyse
170
If that yow list the aungel shul ye see
So that ye trowe on criste and you baptise
Goth forth to via apia quod she
That from this toun ne stant but myles thre
And to the poure folkes that there dwellen
175
Sey hem ryght as that I shal you tellen.
Telle hem that I Cecile yow to hem sente
To shewen you the good vrban the olde
For secree nedes and for good entente
And whan that ye seint vrban han biholde
180
Telle him tho wordes which I to yow tolde
And whan that he hath purged you fro synne
Thanne shal ye see that aungel er we twynne.
This valerian is to the place goon
And ryght as he was taught bi his lernyng
185
He fonde this holy olde vrban anon
Among the seyntes buriels lotynge
And he anon wyth outen tarying
Dide his message and whan that he it tolde
Vrban for ioye his handes gan vp holde
190
The teeris from his eyen leet he falle
Almyghty lorde .o. Iħu crist quod he
Sowere of chast counseil hierde of vs alle
The fruyt of thilk seed of chastitee
That thou hast sowe in Cecile take to the
195
Lo like a bisy bee wyth oute gile
The serueth ay thyn owne thral Cecile
Fro thilke spouse that she took but now
Ful like a fiers leoun she sendeth here
As meke as euer was eny lambe to yow
200
And wyth that worde anon ther gan appere
An olde man clad in white clothes clere
That had a book wyth lettres of gold in hande
And gan biforn Valerian to stande.