The Monk's Tale
Folio 199r
20 of 23 folios
And to his doughter that stood him biside
Which that he knew in high sentence habounde
He bad hir telle him what it signyfiede
And she his dreme by gan right thus expounde
665
The tre quod she the galowes is to mene
And Iuppiter bitokeneth snow and Reyn
And Phebus with his towailes so clene
Tho ben the sonne beemes for to seyn
Thow shalt an hanged be fader certeyn
670
Reyne shal the wasshe and sonne shal the drie
Thus warned him ful plat and ful pleyn
His doughter which that called was phanye
Anhanged was Cresus the proude kyng
His Roial trone myght him nat availle
675
Tragedies / noon other maner thing
Ne can in syngyng crie ne bewaille
But that fortune alway wol assayle
With vnwar strook the Regnes that ben proude
For whan man trusteth hir thanne wol she faille
680
And couere hir bright face with a cloude
O noble .o. worthi Petro glorie of spaigne
Wham fortune heeld so hie in magestee
Wel oghten men thi pitous deth compleyne
Out of thi land thi brother made the flee
685
And after at sege bi subtilite
Thow were bitraised and lad vnto his tente
Where as he with his owne hond slow the
Succedyng in thi Reyne and in thi Rente
The feeld of snow with thegle of blak ther ynne
690
Caught with the lymerod coloured as the glede
He brew this cursednesse and al this synne
The wikked nest was werker of this nede
Noght Charles Olyuere that took ay hede
Of trouth and honour / but of Armorike