The Monk's Tale
Folio 199v
21 of 23 folios
695
Geniloun Olyuer corrupt for mede
Brought this worthi kyng in swich a brike
O worthi petro kyng of Cipre also
That Alisandre wan bi hie maistrie
Ful many a hethen wroghtestow ful wo
700
Of which thin owne liege had enuye
And for no thing but for thi Chyualrye
Thei in thi bed han slayn the bi the morwe
Thus kan fortune hir wheel gouerne and gye
And oute of Ioy brynge men to sorwe
705
Of Melan grete barnabo viscounte
God of delit and stronge of lumbardye
Whi sholde I nat thin Infortune acounte
Sith in estate thow clombe were so hie
Thi brother sone that was thi double allie
710
For he thi nevew / was and sone in lawe
Wit Inne his pisoun made the die
But whi ne how / noot I that thow were slawe
Of the Erle hugelyn of pize the langour
Ther may no tonge telle for pitee
715
But litel out of pise stant a tour
In which tour in prisoun put was he
And with him been hise litel children thre
The oldest Scarsly fyue yeer was of age
Allas fortune it was grete crueltee
720
Swich briddes for to putte in swich a Cage
Dampned was he to dyen in that prisoun
For Rogger which that bisshop was of pize
Hadde on him made a fals suggestioun
Thurgh which the peple gan vpon him rise
725
And putten him to prisoun in swich wise
As ye han herd and mete and drynke he hadde
So smal that vnneth it may suffise
And ther with al it was ful pore and badde