The Squire's Tale
Folio 130r
16 of 19 folios
No were worthi to vnbocle his galoche
Ther doublenesse of feynyng sholde approche
Ne so coude thanke a wyght as he did me
550
His maner was an heuene for to se
Til eny womman were she neuer so wys
So peynted he and kembde poynt deuys
As wel his wordes as his contenaunce
And I so loued him for his obeisaunce
555
That for the trouth I demed in his herte
That yif so were that eny thing him smerte
Al were it neuer so litel and I it wiste
Me thoght I felt deth myn hert twiste
And shortly so ferforth this thing is went
560
That my wille was his willes Instrument
This is to seyn my wille obeide his wille
In al thing as fer as reson fille
Kepyng the boundes of my worship euer
Ne neuer had I thing so leef ne leuer
565
As him god woot ne neuer shal no mo
This laste lenger than a yeer or two
That I supposed of him nat but good
But fynally thus atte laste it stood
That fortune wolde that he moste twynne
570
Out of that place which that I was Inne
Where me was woo that is no questioun
I can nat make of it discripcioun
For oon thing dar I telle boldely
I know what is the peyne of deth therby
575
Suche harme I felte for he ne myght beleue
So on a day of me he took his leue
So sorweful eke that I wende verrily
That he had I feled as moche harme as .y.
And whan that I herd him speke and saugh his hew
580
But nathales I thought it was so trew
And ek that he repeire shold ayeyn
Wyth Inne a litel while soth to seyn
And reson wold eke that he most go