The Pardoner's Prologue & Tale
Folio 151r
6 of 19 folios
That is annexid vnto glotonye
155
The holy writ take I to my witnesse
That luxurie is in wyn and dronkennesse
Lo how that dronken loth vnkyndely
Lay bi his doughtres two vnwityngly
So dronke he was he nyst what he wroght
160
¶ Herodes who so wel the story sought
Whan he of wyn replet was at his fest
Ryght at his owne table he yaf his hest
To sle the baptist Iohan ful giltelees
¶ Senek seith a good word doutelees
165
He seith he can no difference fynde
Betwix a man that is out of mynde
And a man which that is dronkelew
But that woodnesse fallen in a shrew
Perseuereth lenger than doth dronkenesse
170
O glotony ful of cursednesse
O cause first of our confusioun
O original of our dampnacioun
Til crist had bought vs with his blood ageyn
Loketh how dere shortely for to seyn
175
Abought was thilk cursed vileyny
Corrupte was al this world for glotony
¶ Adam our fadre and his wif also
Fro paradys to labour and to wo
Were dryuen for that vice it is no drede
180
For whil that Adam fastid as I rede
He was in paradys and whan that he
Eet of that fruyte deffended on a tree
Anon he was oute cast to wo and peyne
O glotony on the wel oght vs pleyne
185
O wist a man how many maladies
Folowen of excesse and of glotonyes
He wolde been the moore mesurable
Of his diete sittyng at his table
Allas the shorte throte the tendre mouth
190
Makith that Est and West and North and Soutħ