The Miller's Tale
Folio 36r
15 of 18 folios
I moorne as dooth a lamb aftyr the tete
I wis lemman I haue swich loue longyng
520
That like a tirtel trew is my moornyng
I may nat ete na moore than a mayde
Go fro the wyndow Iakke fool she saide
As helpe me god it wil not be come ba me
I loue a nother and elles I were to blame
525
Wel bet than the bi Iħu absolon
Go forth thi wey or I wol cast a ston
And let me slepe a twenty dyuelwey
Allas quod absolon and welawey
That trew loue was euer so euel biset
530
Than kys me syn that yt may be no bet
For Iħus loue and for the loue of me
Woltow thanne go thi wey therwyth quod she
Ye certes lemman quod this absolon
Thanne make the redy quod she I come anon
535
This absolon doun set him on his knees
And seide I am a lord at al degrees
For aftyr this I hope ther cometh moore
Lemman thi grace and swete bridde thyn ore
The wyndew she vndoth and that in hast
540
Haue do quod she com of and spede the fast
Lest that our neigbours the espye
This absolon gan wipe his mouth ful drye
Derk was the nyght as pich or as the cole
And at the wyndow oute she put hir hole
545
And absolon him fil no bet ne wers
But wyth his mouth he kiste hir naked ers
Ful sauourly er he wer war of this
Abak he stert and thought it was amys
For wel he wist a womman hath no berde
550
He felt a thing al rogh and long yherd
And seide fi allas what haue y do
Te he quod she and clapt the wyndow to
And absolon goth forth a sory paas
A berd aberd seide hende Nicholas
555
By goddes corpus this goth fair and wel
This sely absolon herd euery del