The Tale of Gamelyn
Folio 61r
5 of 24 folios
He seyde broþer Gamelyn aske me þy boone
And loke þou me blame but I gaunte sone
155
Thanne seyde Gamelyn broþer I wys
And we schulle ben at oon þou most me gaunte þis
Al þat my fader me byquaþ whil he was on lyue
Þou most do me it haue ȝif we schul nat stryue /
That schalt þou haue Gamelyn I swere by cristes ore
160
Al þat þi fader þe byquaþ þough þou woldest haue more
Thy lond þat lyþ laye ful wel it schal be sowe
And þyn howses reysed vp þat ben leyd so lowe
Thus seyde þõ knigħt to Gamelyn wiþ mowþe /
And þought eek of falsnes / as he wel couþe /
165
The king þought on tresoū / and Gamelyn on noon
And went and kist his broþer / and whan þey were at oon
Allas ȝonge Gamelyn noþing he ne wiste /
Wiþ which a fals tresoū his broþer hī kiste /
LIþeth and lestneþ and holdeþ ȝour tonge
170
And ȝe schul heere talkyng of Gamelyn þe yonge
Ther was þer bysiden cryed a wrastlyng
And þerfor þer was sette vp a Ram and a Ryng
And Gamelyn was in good wil / to wende þerto /
For to preuen his migħt what he cowþe do
175
Broþer seyde Gamelyn by seynt Richer
Thou most lene me to nyȝt // a litel Courser
That is freisch to þe spore on for to ryde
I most on an Erande a litel her byside
By god seyd his broþer of steedes in my stalle
180
Go and chese þe þe best and spare non of alle
Of steedes or of course þat stonden hem bisyde
And tel me goode broþer whider þou wolt ryde
¶ Her byside broþer is cryed a wrastlyng
And þerfor schal be set vp a Ram and a Ryng /
185
Moche worschip it were broþer to vs alle
Might I þe Ram and þe Ryng bryng home to þis halle
A steede þer was sadeled smertely and skeet
Gamelyn did a paire spores fast on his feet
He set his foot in styrop / þe steede he bystrood
190
And toward þe wrastelyng þe ȝonge child rood