The Second Nun's Tale
Folio 187v
5 of 14 folios
¶ Valerian / gan faste vn to hir swere
That for no cas / ne thyng that mygħte be
150
He sholde neuere mo / biwreyen here
And thanne at erst to hym thus seyde she
I haue an Aungel / which that loueth me
That with greet loue / wher so I wake or sleepe
Is redy ay / my body for to kepe
155
And if he / may feelen out of drede
That ye me touche / / or loue in vileynye
He rigħt anon / wol sle yow with the dede
And in youre yowthe / thus ye sholden dye
And if that ye / in clene loue me gye
160
He wol yow louen as me / for youre clennesse
And shewen yow / his ioye and his brigħtnesse
¶ Valerian / corrected / as god wolde
Answerde agayn / if I shal trusten thee
Lat me that Aungel se / and hym biholde
165
And if that it a verray Angel bee
Thanne wol I doon / as thou hast prayed me
And if thou loue / another man / for sothe
Rigħt wt this swerd / thanne wol I sle yow bothe
Cecile answerde anon / rigħt in this wise
170
That if yow list . the Angel shul ye see
So þt ye trowe in Crist and yow baptize
Gooth forth / to Via Apia / quod shee
That fro this toun / ne stant but Miles three
And to the poure folkes / þt ther dwelle
175
Sey hem rigħt thus / as that I shal yow telle
Telle hem / that I Cecile / yow to hem sente
To shewen yow / the goode Vrban the olde
For secree thynges / and for good entente
And whan that ye / Seint Vrban han biholde
180
Telle hym the wordes / whiche þt I to yow tolde
And whan þt he / hath purged yow fro synne
Thanne shul ye se / that Angel er ye twynne
¶ Valerian / is to the place ygon
And rigħt as hym was taugħt / by his lernynge
185
He foond this hooly / olde Vrban anon
Among the Seintes buryeles lotynge .i. latitantem
And he anon / with outen tariynge
Dide his message / and whan þt he it tolde
Vrban for ioye / hise handes gan vp holde