The Second Nun's Tale
Folio 192r
14 of 14 folios
Thre strokes in the nekke / he smoot hir tho
The tormentour but for no maner chaunce
He mygħte nogħt smyte / al hir nekke atwo
And for ther was / that tyme an ordinaunce
530
That no man / sholde doon men swich penaunce
The ferthe strook to smyten softe or soore
This tormentour / ne dorste do namoore
But half deed / with hir nekke ycoruen there
He lefte hir lye / and on his wey he went
535
The cristen folk / which that aboute hir were
With sheetes / han the blood / ful faire yhent
Thre dayes lyued she / in this torment
And neuere cessed / hem the feith to teche
That she hadde fostred / hem she gan to perche
540
And hem she yaf / hir moebles / and hir thyng
And to the Pope Vrban / bitook hem tho
And seyde / I axed this at heuene kyng
To han respit . thre dayes and namo
To recomende to yow / er that I go
545
Thise soules lo / and þt I myghte do werche
Heere of myn hous / perpetuelly a cherche
¶ Seint Vrban / with hise deknes piuely
This body fette / and buryed it by nyghte
Among hise othere seintes / xx honestly
550
Hir hous / the chirche / of seinte xx Cecilie highte
Seint Vrban halwed it as he wel myghte
In which / in to this day / in noble wyse
Men doon to Crist . and to his seinte seruyse
¶ Heere is ended / the Seconde Nonnes tale ~