The Tale of Gamelyn
Folio 68v
20 of 24 folios
Tho þougħt þe fals knigħt for to ben awreke
And leet take Gamelyn most he nomore speke
725
M~igħt þer be nomore grace but Gamelyn atte last
Was cast in to prisoū and fetered ful fast
Gamelyn haþ a broþer þat highte sir Ote
As good a knight and heende as mighte gon on foote
Anon þer ȝede a messager to þat goode knight
730
And told him altogidere how Gamelyn was dight
Anon as sire Ote herde how Gamelyn was a dight
He was wonder sory was he no þing ligħt
And leet sadle a steede and þe way he nam
And to his tweyne breþeren anon right he cam
735
Sire seyde sire Ote / to þe Scherreue þo /
We ben but þre breþeren schul we neuer be mo
And þou hast y pisoned þe best of vs alle /
Swich anoþer broþer yuel mot him bifalle
Sire Ote seide þe fals knigħt lat be þi curs /
740
By god for þy wordes he schal fare þe wurs
To þe kynges prisoun anon he is y nome
And þer he schal abyde til þe Iustice come
Par de seyde sir Ote better it schal be
I bidde him to maympis þat þou gaunt him me
745
Til þe nexte sittyng of delyueraunce
And þanne lat Gamelyn stande to his chaunce
Broþer in swich a forthward I take him to the /
And by þi fader soule þat þe bygat and me
But if he be redy whan þe Iustice sitte /
750
Thou schalt bere þe Iuggemēt for al þi grete witte
I gaunte wel seide sir Ote þat it so be
Let delyuer him anon and tak him to me /
Tho was Gamelyn delyuered to sire Ote his broþer
And þat night dwelleden þat on wiþ þat oþer
755
On þe morn seyde Gamelyn to sire Ote þe heende
Broþer he seide I moot / forsoþe fro þe wende
To loke how my ȝonge men leden here lyf
Wheþer þey lyuen in ioye or elles in stryf
By god seyde sire Ote / þat is a cold reed
760
Now I see þat al þe cark schal fallen on myn heed
For whan þe Iustice sitte and þou be nought I foūde /