The Summoner's Tale
Folio 86r
11 of 13 folios
Thou shalt abye this fart if that I may
¶ His meynee / whiche that herden this affray
Cam lepynge In / and chaced out the frere
450
And forth he gooth / with a ful Angry cheere
And fette his felawe / ther as lay his stoor
He looked / as it were a wilde boor
He grynte with his teeth / so was he wrooth
A sturdy paas / doun to the lordes cort he gooth
455
Where as woned a man / of greet honour
To whom / that he was alwey confessour
This worthy man / was lord of that village
This frere cam / as he were in a rage
Wher as this lord / sat etyng at his bord
460
Vnnethes / mygħte the frere speke a word
Til atte laste / he seyde god yow see
¶ This lord bigan to looke / and seide benedicitee
What frere Ioħn / what maner world is this ;
I trowe / som maner thyng ther is amys
465
Ye looken / as the wode / were ful of theuys
Sit doun anon / and tel me what your grief is
And it shal been amended / if that .I. may
¶ I haue quod he / had a despit this day
God yelde yow / adoun in your village
470
That in this world / is noon so poure a page
That he nolde haue abhomynacioū
Of that I haue receyued in youre toun
And yet greueth me / no thyng so soore
As that this olde cherl / with lokkes hoore
475
Blasphemed Hath / oure hooly Couent eke
¶ Now maister quod this lord / I yow biseke
¶ No maister quod he / but seruitour
Thogħ I haue had in scole swich honour
God liketh nat that Raby men vs calle
480
Neither in Market ne in youre large halle
¶ Nofors quod he / but tel me al youre grief
¶ Sire quod he an odious meschief
This day bityd is / to myn ordre and me
And so par consequens in ech degree
485
Of hooly chirche / god amende it soone
¶ Sir quod the lord / ye woot what is to doone
Distempre yow nogħt / ye be my Confessour
Ye been the salt of the erthe / and the sauour
For goddes loue / youre pacience ye holde
490
Tel me your grief / and he anon hym tolde
As ye han herd biforn / ye woot wel what
¶ The lady of the hous / al stille sat /
Til she had herd / what the frere sayde
Ey goddes mooder quod she / blisful mayde