The Summoner's Tale
Folio 82v
4 of 13 folios
And studie / in Petres wordes / and in Poules
I walke / and fissħe cristen mennes soules
To yelden Ihū crist / his propre rente
To sprede his word / is set al myn entente
115
¶ Now by youre leue / o deere sir quod she
Chideth hym weel / for seinte Trinitee
He is as angry / as a pissemyre
Though þt he haue / al that he kan desire
Thougħ I hym wrye a nygħt / & make hym warm
120
And on hym leye my leg outher myn Arm
He groneth lyk oure boor / lith in oure sty
Oother desport rigħt noon of hym haue I
I may nat plese hym / in no maner cas
¶ O Thomas / Ie vous dy / Thomas / Thomas
125
This maketh the feend / this moste ben amended
Ire is a thyng that hye god defended
And ther of / wol I speke a word or two
¶ Now maister quod the wyf er þt I go
What wol ye dyne / ; I wol go ther aboute
130
¶ Now dame quod he / now Ie vous dy sanz doute
Haue I nat of a capou / but the lyuere
And of youre softe breed / nat but a shyuere
And after that a rosted pigges heed
But that I nolde / no beest for me were deed
135
Thanne hadde I with yow hoomly suffisaūce
I am a man / of litel sustenaūce
My spirit hath his fostryng in the Bible
The body is ay / so redy and penyble
To wake / that my stomak is destroyed
140
I prey yow dame / ye be nat anoyed
Though I so freendly / yow my conseil shewe
By god / I wolde nat telle it / but a fewe
¶ Now sir quod she / but o word er I go
My child is deed / with Inne thise wykes two
145
Soone after / þt ye wente out of this toun
¶ His deeth / saugh I by reuelacioun
Seith this frere / at hoom in oure dortour
I dar wel seyn / that er þt half an hour
After his deeth / I saugħ hym born to blisse
150
In myn Avisiou / so god me wisse
So dide oure Sexteyn / and oure Fermerer
That han been trewe freres / fifty yeer
Thiy may now / god be thanked of his loone
Maken hir Iubilee / and walke allone
155
And vp I roos / and al oure Couent eke
With many a teere / triklyng on my cheke
With outen noyse / or claterynge of belles
Te deū was oure song / and no thyng elles