The Nun's Priest's Tale
Folio 181v
6 of 14 folios
Mordre wol out this my conclusioū
And right anon / Ministres of that toun
Han hent the Carter / and so soore hym pyned
240
And eek the hostiler / so soore engyned
That they biknewe / hir wikkednesse anon
And were an hanged / by the nekke bon
¶ Heere may men seen / þt dremes been to drede
And certes / in the same book / I rede
245
Rigħt in the nexte Chapitre after this
I gabbe nat. so haue I ioye or blis
Two men / that wolde han passed ouer see
For certeyn cause / in to a fer contree
If that the wynd / ne hadde been contrarie
250
That made hem / in a Citee for to tarie
That stood ful myrie / vpon an hauen syde
But on a day / agayn the euen tyde
The wynd gan chaunge / and blew rigħt as hem leste
Iolif and glad / they wente vn to hir reste
255
And casten hem / ful erly for to saille
¶ But herkneth / to that o man / fil a greet meruaille
That oon of hem / in slepyng as he lay
Hym mette a wonder dreem / agayn the day
Hym thoughte / a man stood by his beddes syde
260
And hym comanded / þt he sholde abyde
And seyde hym thus / if thou tomorwe wende
Thow shalt be dreynt my tale is at an ende
¶ He wook / and tolde his felawe what he mette
And preyde hym / his viage to lette
265
As for that day / he preyde hym to byde
¶ His felawe / that lay / . by his beddes syde
Gan for to laugħe / and scorned hym ful faste
No dreem quod he / may so myn herte agaste
That I wol lette / for to do my thynges
270
I sette nat a straw / by thy dremynges
For sweuenes / been but vanytees and Iapes
Men dreme al day / of Owles / or of Apes
And of many a maze / therwith al
Men dreme of thyng þt neuere was ne shal
275
But sitħ I see / that thou wolt heere abyde
And thus forslewthen / wilfully thy tyde
God woot it reweth me / and haue good day
And thus / he took his leue / and wente his way
But er þt he hadde / half his cours yseyled
280
Noot I nat why / ne what myschaunce it eyled
But casuelly / the shippes botme rente
And shipe and man / vnder the water wente
In sigħte of othere shippes / it bisyde
That with hem seyled / at the same tyde