The Tale of Gamelyn
Folio 69v
22 of 24 folios
800
The fals knigħt his broþer forȝat he nat þat
To huyre þe men on his quest to hangen his broþer
Thougħ he hadde nought þat oon he wolde haue þat oþer
Tho cam Gamelyn fro vnder woode Rys
And broughte wiþ him / his ȝonge men of prys
805
¶ I se wel seyde Gamelyn þe Iustice is sette
Go aforn adam and loke how it spette
Adam went ī to þe halle and loked al aboute
He seyh þere stonde lordes gret and stoute /
And sir Ote his broþer fetered wel fast
810
Þo went adam out of halle as he were agast
Adam said to Gamelyn and to his felaws aƚƚ
Sir Ote stant I fetered in þe moot haƚƚ
Ȝonge men seide Gamelyn þis ȝe heeren aƚƚ
Sire Ote stant I fetered in þe moot haƚƚ
815
If god ȝif vs grace wel for to doo
He schal it abegge þat broughte þertoo
Thanne sayde adam þat lokkes hadde hore /
Cristes curs most he haue þat him bond so sore
And þou wilt Gamelyn do after my red
820
Ther is noon in þe haƚƚ schal bere a wey his heed
Adam seyde Gamelyn we wiln nougħt don so /
We wil slee þe giltyf and lat þe oþer go
I wil in to þe halle / and wiþ þe Iustice speke
On hem þat ben gultyf I wil ben a wreke
825
Lat non skape at þe dore take ȝonge men ȝeme /
For I wil be Iustice þis day domes to deme
God spede me þis day at my newe werk
Adam com on wiþ me / for þou schalt be my clerk
His men answereden hī and bad him doon his best
830
And if þou to to vs haue neede þou schalt fynde vs perst
We wiln stande with þe whll þat we may dure
And but we werke manly pay vs non hure /
Yonge men seyde Gamelyn so mot I wel þe /
As trusty a maister ȝe schal fynde of me /
835
Right þere þe Iustice sat in þe halle
In wente Gamelyn amonges hem alle /
¶ Gamelyn leet vnfetere his broþer out of beende