The Summoner's Tale
Folio 115r
14 of 17 folios
And it schal ben amendit if þat I may
I haue quod he had a despit to day
God ȝelde ȝow a doun in ȝoure vilage
470
That in þis world is noon so pore a page /
That he nold haue abhominaciou~
Of þat I haue receyued in ȝoure toun
And ȝet ne greuith me no þing so sore
As þat þis elde cherl wiþ lokkes hore
475
Blasphemed haþ our holy couent eeke
Now maister quod þis lord I ȝow biseke
No maister sir quod he but seruitour .
Þough I haue had in scole such honour
God likith not þat Raby men vs calle
480
Neither in market neyther in ȝour large halle
No fors quod he tellith me al ȝour greef
Þis frere sayd sire an odious meschief
This day bytid is to myn ordre and to me
And so par consequens to ech degre
485
Of holy chirche god amend it soone
Sir quod þe lord ȝe wot what is to doone
Distempre ȝow nought ȝe ben my confessour
Ȝe ben þe salt of þerþe and sauyour
For goddes loue ȝoure pacience ȝe holde
490
Tel me ȝour greef and he anoon him tolde
As ȝe han herd bifore ȝe wot wel what
The lady of þat hous ay stille sat
Til sche had herd what þe frere sayde
Ey goddes moodir quod sche blisful mayde
495
Is þer ought elles tel me faithfully
Ma dame quod he how þynke ȝow þerby
How þat me þynkith quod sche so god me speede
I say a cherl haþ doon a cherles deede
What schuld I say god let him neuer þe
500
His syke heed is ful of vanyte
I hold hym in a maner frenesye /
Ma dame quod he I wis I schal not lye
But I in oþir wise may be wreke
I schal defame him ouer al wher I speke /