The Squire's Tale
Folio 155r
14 of 17 folios
And as I am a kynges doughter trewe
If þat I verrayly þe cause knewe
Of ȝour disese if it lay in my might
460
I wold amenden it if þat I might
Als wisly help me grete god of kynde
And herbes schal I right ynowe fynde
To helen with ȝour hurtes hastyly
Tho schright þis faukoū more pitously
465
Than euer sche did and fil to ground anoon
And lay a swowne deed as eny stoon
Til Canace hath in hir lap y take
Vnto þat tyme sche gan of swowne slake /
And after þat sche gan of swoun abreyde
470
Rigħt in hir haukes lydne thus sche seyde
That pite renneth sone in gentil hert
Felyng his similitude in peynes smerte /
Is proued alday as men may see
As wel by werk as by auctorite
475
For gentil herte keþeth gentillesse /
I see wel þat ȝe haue on my distresse
Compassioū my faire Canace
Of verray wōmanly benignite /
That nature in ȝour principles haþ set
480
But noon hope for to fare þe bet
But for to obeye vnto ȝour herte fre
And for to make other war by me
As by þe whelp chastised is þe lyou~
And for þat cause and þat conclusiou~
485
Whiles þat I haue a leyser and a space
Myn harm I wil confessen er I pace
And whil sche euer of hir sorwe tolde
That oþer wept as sche to water wolde /
Til þat þe faucoū bad hir to be stille /
490
And with a sighhe / þus sche sayd hir tille
Ther I was allas þat ilke day
And fostred in a Roch of marble gray
So tendrely that noþing eyled me /
I wiste not what was aduersite