The Tale of Gamelyn
Folio 72v
24 of 26 folios
Ordeigne how it schal be and it schal be do
Whil Gamelyn was comyng þer þe Iustice satte
800
The false knigħt his broþer for yatte he not þatte
To hire þe men on his quest to hangen his broþer
Though þey hadde nought þat oon he wolde haue þat oþer
Tho cam Gamelyn fro vnder woode Rys
And broughte with him ȝonge men of prys
805
I se wel seyde Gamelyn the Iustice is sette
Go aforn adam and loke how it spette
Adam wente in to þe halle and loked aƚƚ aboute
He seih þere stonde lordes boþe grete and stoute
And sire Ote his broþer fetered wel fast
810
Tho went adam out of halle as he were agast
Adam seide to Gamelyn and to his felawes aƚƚ
Sire Ote stant fetered in þe moot haƚƚ
Yonge men sayde Gamelyn þis þey heeren alle
Sire Ote stant fetered in þe moot haƚƚ
815
If god yif vs grace wel for to do
He schal it abegge þat it broughte þerto
Thanne seyde Gamelyn þat lokkes hadde hore
Cristes curs most he haue þat him bond so sore
And þou wolt Gamelyn don after my reed
820
Ther is non in þe haƚƚ schal bere awey his heed
Adam seyde Gamelyn we wille nought doon so
We wol sle þe gultyf and late þe oþer go
I wil in to þe halle and wiþ þe Iustice speke
On hem þat ben gultyf I wol ben a wreke
825
Late non scape at þe dore yonge men take yeme
For I wol be Iustice þis day doomes to deeme
God speede me þis day at my newe werk
Adam com with me for þou schalt be my clerk
His men answerede him and bad him don his best
830
And if þou to vs haue neede þou schalt fynde vs perste
We wiln stande with þe whil þat we may dure
And but we werken manly pay vs non hur
Yonge men sayde Gamelyn so mot I wel þee /