The Tale of Gamelyn
Folio 73r
25 of 26 folios
As trusty a maister ye schal fynde of me
835
Right þer þe Iustice sat in þe haƚƚ
In wente Gamelyn amonges hem aƚƚ
Gamelyn leet vnfettere his broþer out of bende
Thanne seide sir Otes his broþer þat was heende
Thou haddest almost Gamelyn dwelled to longe /
840
For þe queste is out on me þat I scholde honge
Broþer seide Gamelyn so god yif me good rest
This day þey schul ben hanged þat ben vpon þe quest
And þe Iustice boþe þat is þe Iugge man
And þe schirriue boþe þorugħ him it bigan
845
Thanne seyde Gamelyn to þe Iustise
Now is þy power don þou most nedes arise
Thou hast yiuen doomes þat ben yuel digħt
I wil sitten in þi sete and dressen hem arigħt
The Iustice sat stille and roos nought anoon
850
And Gamelyn cleuede his cheke boon
Gamelyn tok him in his armes and nomore spak
But þrewe him ouer þe barre and his arme tobrak
Durste non to Gamelyn seye but good
For fered of þe companye þat wiþoute stood
855
Gamelyn sette hī doun in þe Iustices sete
And sire Otes his broþer by hī and adam at his feet
Whan Gamelyn was sette in þe Iustices sete /
Herkne of a bourde þat Gamelyn dede
He leet fetere þe Iustice and his false brother
860
And leet hem come to þe barre þat oon wiþ þat oþer
Tho Gamelyn hadde þus y don hadde he no rest
Til he hadde enquered who was on þe quest
For to deemen his broþer sire Otes for to honge
Er he wiste which þei were he þoughte ful longe
865
But as sone as Gamelyn wiste wher þey were
He dede hem euerichon feteren in fere
And bringen hem to þe barre and sette hem in Rewe
By my faith seide þe Iustice þe Scherreue is a schrewe /
Thanne sayde Gamelyn to þe Iustice