The Tale of Gamelyn
Folio 72r
23 of 26 folios
I schal anon be take and in þy stede y bounde
Broþer sayde Gamelyn dismaie þe nougħt
For by saint Iame in Gales that many man haþ sougħt
765
If þat god almighty holde me my lyf and witte
I wil be þere redy whan þe Iustice sitte
Thanne seide sire Ote to Gamelyn god schilde þe fro schame
Com whan þou seest tyme and bryng vs out of blame
¶ Litheth and lesteneth and holdeþ ȝou stille
770
And ȝe schulle heere how Gamelyn hadde his wille
Gamelyn wente vnder þe woode Rys
And fond þere pleying yonge men of pris
Tho was yonge Gamelyn right glad ynougħ
Whan he fond his men vnder þe woode bougħ
775
Gamelyn and his men talked in feere
And þey hadde good game here maister to heere
His men tolden him of auentures þat þei hadde y founde
And Gamelyn him tolde aȝein how he was faste bounde
Whil Gamelyn was outlawe hadde he no curs
780
Ther was no man þat for him ferde þe wors
But abbotes and piours monk and Chanoū
On of hem lefte he nought whan he might hem nom
Whil Gamelyn and his men made merþes Ryue
The false knight his broþer yuel mote he þriue
785
For he was faste aboute boþe o day and oþer
For to hire þe queste to hangen his broþer
Gamelyn stood on a day and as he biheeld
The woodes and þe schawes in þe wilde feeld
He þought on his broþer how he him beheet
790
Þat he wolde be redy whan þe Iustice seet
He þoughte wel þat he wolde wiþoute delay
Come afore þe Iustice to keepen his day
And seide to his yonge men dighte yow ȝare
For whan þe Iustice sitte we mote be þare
795
For I am vnder borwe til þat I come /
And my broþer for me to prisoū schal be nome
By seint Iame seide his yonge men and þou rede þertoo