The Tale of Gamelyn
Folio 73v
26 of 26 folios
870
Thou hast youe doomes of þe wors assise
And þe .xij. Sisours that weren of þe queste
They schulle ben hanged þis day so haue I good reste
Thanne seyde þe Scherreue to yonge Gamelyn
Lord I crye þe mercy broþer art þou myn
875
Therfore saide Gamelyn haue þou cristes curs
For and þou were maister yet I schulde haue wors
For to make schort tale and nought to long
He ordeigned him a queste of his men so strong
The Iustice and þe Scherreue beþ honged hye
880
To weiuen with þe Ropes and with þe wynd drye
And þe .xij. sisours sorwe haue þat rekke
Aƚƚ þey were hanged faste by þe nekke
Thus endeth þe false knight with his treccherie
That euer hadde lad his lyf in falsnes & folye
885
He was hanged by þe necke and nought by þe purs
That was þe meede þat he hadde for his fadres curs
Sire Otes was eldest and Gamelyn was ying
Wenten with here frendes and passed with þe king
They made pees with þe king of þe best assise
890
The king loued wel sire Ote and made him Iustice
And after þe king made Gamelyn boþe in est and west
Cheef Iustice of his fre Forest
Aƚƚ his wighte yonge men þe king for yaf here gilt
And siþþen in good office þe king haþ aƚƚ hem pilt
895
¶ Thus wan Gamelyn his lond and his leede
And wrak hī of his enemys and quitte hē here meede
And sire Ote his broþer made him his heir
And siþþen wedded Gamelyn a wyf a good and a fair
They lyueden togidere whil þat crist wolde
900
And siþþen was gamelyn grauen vnder molde
And so schal we aƚƚ may þer nomā flee
God bring vs to þe Ioye þat euer schal be AmeN pr charite
Owre oost saugh wel þat by þe brighte sonne
The ark of his artificial day hadde ronne
The ferþe part of half an hour and moore