The Tale of Gamelyn
Folio 64(b)r
7 of 26 folios
185
Moche worschipe it were broþer to vs aƚƚ
Might I þe Ram and þe ryng bryngen hom to þis haƚƚ
A steede þer was Sadeled smartly and skeet
Gamelyn dide a paire spores fast on his feet
He sette his foot in þe styrop þe steede he bistrood
190
And toward þe wrastelyng þe ȝonche child rood
Tho Gamelyn þe yonge was ryden out atte gate
The false knight his broþer loked it after þate
And bisoughte ihū crist þat is heuen king
He mighte breke his necke in þat wrastlyng
195
As sone as gamelyn com ther þe place was
He lighte doun of his steede and stood on þe gras
And þer he herde a Frankeleyn wayloway syng
And bigan bitterly his hondes for to wryng
Goode man seide Gamelyn whi makest þou þis far
200
Is þer noman þat may ȝou helpen out of þis care
Allas seide þis Frankeleyn þat euer was I bore
For tweye stalworþe sones I wene þat I haue lore
A champioū is in þe place þat haþ y wrought me sorwe
For he haþ slayn my tuo sones but if god hem borwe
205
I wolde ȝiue ten pound by ihū crist and more
Wiþ þe nones I fand a man to handelen him sore
Goode man seide Gamelyn wilt þou wel done
Hold myn hors whil my man draweþ of my schone
And help my man to kepe my cloþes and my steede
210
And I wil in to þe place gon to loke if I may speede
By God seide þe Frankeleyn it schal be doon
I wol my self be þy man to drawen of þi schoon
And wende þou in to þe place ihū crist þe speede
And drede not of þi cloþes nor of þi goode steede
215
Barfot and vngert Gamelyn in came
Alle þat were in þe place heede of him þei name
How he dorste auntre him of him to don his migħt
That was so doughty a champioū in wrastelyng and in figħt
Vp sterte þe Champioū rapely anon
220
Toward ȝonge Gamelyn he bigan to goon