The Tale of Gamelyn
Folio 64(b)v
8 of 26 folios
And seide who is þi fader and who is þi sire
For soþõ þou art a gret fool þat þou come hire
Gamelyn answerde þe Champioū þo /
Thou knewe wel my fader whil he couþe goo
225
Whiles he was on lyue by seint Martyn
Sire Ioħn of Boundes was his name and I Gamelyn
Felawe seide þe Champioū so mote I þriue
I knew wel þi fader whil he was on lyue
And þi self Gamelyn I wol þat þou it heere
230
Whil þou were a ȝong boy a moche schrewe þou were /
Than seide Gamelyn and swor by cristes oore
Now I am oldere woxe þou schalt fynde me a more
By god sayde þe champioū welcome mote þou be /
Come þou ones in myn hond schalt þou neuer þe
235
It was wel wiþinne þe nigħt and þe moone schon
Whan Gamelyn and þe Champioū togidere gonne gon
The champioū caste tornes to Gamelyn þat was preste
And Gamelyn stood stille and bad him don his beste
Thanne seyde Gamelyn to þe champioū
240
Thou art faste aboute to bringe me doun
Now I haue proued many tornes of þine
Thou most he seyde prouen on or tuo of myne
Gamelyn to þe Champioū yede smertly anoon
Of aƚƚ þe turnes þat he couþe he schewed him but oon
245
And kast hī on þe left syde þat þe ribbes to brak
And þarto his oon arm þat yaf a gret crak
Þan seyde Gamelyn smertly anoon
Schal it be holde for a cast or elles for noon
By god seyde þe Champioū wheþer þat it be
250
He comeþ oones in þin hond schal he neuer þe
Than seyde þe Frankelein þat hadde his sone þere /
Blessed be þou Gamelyn þat euer þou bore were
The Frankeleyn seide to þe champioū of him stod him non eye
This is ȝonge Gamelyn þat taughte þe þis pleye
255
Aȝein answerde þe Champioū þat liked noþing welle
He is oure alþer maister and his pley is right felle /