The Tale of Gamelyn
Folio 64(a)v
6 of 26 folios
Com a doun þan to me and gaunte me my boone
150
Of þing I wol þe asken and we schul saughte soone
Doun þan cam his broþer þat fikel was and felle
And was swithe sore agast of þe pestelle
He seyde broþer Gamelyn aske me þy boone
And loke þou me blame but I \it/ gaunte soone
155
Thanne seyde Gamelyn broþer y wys
And we schulle ben at on þou most me gaunte þis
Al þat my fader me biquath whil he was on lyue
Thou most do me it haue if we schulle nouȝt stryue
That schalt þou haue Gamelyn I swere by cristes oore
160
Al þat þi fader þe byquath þougħ þou woldest haue more
Thy lond þat lieth laye wel it schal be sowe
And þine houses reised vp þat ben y leyd so lowe
Thus sayde þe knight to Gamelyn by mouþe
And þoughte of falsnesse as he wel couþe
165
The knight þought on tresoū and Gamelyn on noon
And went and kissed his broþer and when þey weren at oon
Allas yonge Gamelyn noþing he ne wist
Wiþ such fals tresoun his broþer him kist
Liþeneth and lesteneþ and holdeþ youre tonge
170
And ȝe schul heere talkyng of gamelyn þe ȝonge
Ther was þer besyden cried a wrastelyng
And þer fore þer was vp y set a Ram and a ryng
And Gamelyn was in wille to wende þerto
For to preuen his might what he couþe doo
175
Broþer seyde Gamelyn by seint Richer
Thou most lene me to night a litel courser
That is freissch to þe spores on for to ryde
I moste on an Erande alitel here besyde /
By god seyde his broþer of steedes in my stalle
180
Go and chese þe þe beste spare non of aƚƚ
Of steedes or of coursers þat stonden hī bysyde
And telle me goode broþer whider þou wolt ryde
Here besyde broþer is cryed a wrastlyng
And þerfore schal be sette a Ram and a Ryng Moche worschipe