The Summoner's Tale
Folio 240v
12 of 14 folios
What frere Ihū what maner world is þis
I se wel þt sūthyng þere is a mys
465
Ȝe loke as thow þe wode were ful of thewys
Sit doū a non & telle vs what ȝoure fgref is
And it schal ben a mendyt If I may
I haue quod he had a dispit to day
God ȝilde ȝow a doū in ȝoure village
470
That in þis world nys nō so poure a page
That he nulde haue abomynacioū
Of þt I hare resseyuyd in ȝoure toū
And ȝit ne greuyth me no þyng so sore
As þt þis olde cherl with lokys hore
475
Blasfemyd hath ouro holy couent ek
Now maystyr quod þe lord I ȝow be sek
No maystyr quod he sire but seruytour
Thow I haue had in scole þt honour
God lykyth not þt rabi men vs calle
480
Neyþer in market nȳ in ȝoure large halle
Nofors quod he but telle me al ȝoure gref
Syre quod þis frere an odyous myschef
Þis day is betid to myn ordere & me
And so par concequens to eche degre
485
Of holy cherche god a mende it sone
Syre quod þe lord ȝe wete what is to done
Distemperyth ȝow not ȝe ben myn confessour
Ȝe ben þe salt of þe cherche & þe sauour
For godys loue ȝoure pacience ȝe holde
490
Telle me ȝoure gref & he anon hȳ tolde
As ȝe han herd be fore ȝe wete xxxx wel what
Te lady of þe hous ay stille sat
Til sche hadde herd what þe frere seyde
Ey godis modyr quod sche blysful mayde
495
Is þere not elle telle me feythfully
Madame quod he how lykyth ȝow herby
How þt me thȳkyth quod sche so god me speede
I seye a cherl haþ don a cherlis dede
What schulde I seye god lete hȳ neuere the
500
His syke hed is ful of vanyte ~