The Second Nun's Tale
Folio 153v
4 of 13 folios
I wedded be þat was ful ȝonge of Age
Whiche þat ycleped was waleriane
130
And þe daie was cōmen of his mariage
Sche fel deuoute & homble in hire Corage
Vnder hire robe of golde þat satte ful faire
And next hir flesche yclad hire in an haire
¶ And while þe orgen\s/ maden melodie
135
To god god alone þus in hert songe sche
O lorde my soule & eke my bode gie
Vnwemed lest þat .I. confounded be
And for his loue þat deied vpon a tree
Euery secunde or þe þred daie sche fast
140
Aie biddige in hir orisons ful fast
¶ The nyht came & to bed sche most gone
Wiþ hir husbond as often is þe manere
And piuely sche seide anone
O swete & wel be loued spouse dere
145
Þer is a counsel & ȝe wold it here
Whiche þat riht feine .I. wil vnto seine
So þat ȝe me assured it nouȝt to be wreine
¶ Valerian gan fast vn to hir swere
Þat for no caas ne þinge þat miht be
150
He scholde for no þinge neuere be wrien hire
And þann att erst vn to him þus seid sche
.I. haue an Angel whiche þat loueþ me
Þat wiþ grete loue wheþer so y wake or slepe
Is rede ay my bode for to kepe
155
And ȝif þat he may felen oute of drede
160
He wolde ȝowe loue as me for ȝoure clennesse
And schewen ȝowe of his ioye & his brihtnesse
¶ Valerian correctid as god wolde
Ansewerd aȝeine if .I. schal truste to þe
Latt me þat Angel see & him be holde
165
And if þat it a verraie Angel be
Þan wil .I. done as þou hast preide me
And if þou loue a noþere man for soþe
Riht wiþ þis swerde .I. wil sle ȝowe boþe
¶ Cecile ansewerd anone in þis wise
170
If þat ȝowe lust þat Angel schal ȝe see
So þat ȝe trowe on criste & ȝowe baptize
Goþe forþe to via apia qd sche
That frome þis toune ne stant bot miles þree