The Nun's Priest's Tale
Folio 367r
5 of 14 folios
Hȳ thoughte his dreem nas but a vanyte
Thus twyis in his slepȳge dremede he
And at the thredde tyme / ȝit his felawe
195
Cam as hȳ thoughte / & seyde I am now slawe
Byhold mȳne blody woūdis deepe & wyde
A ris vp erly in the morwe tyde
And at the west gate / of the toū quod he
A carteful of donge / there thu schat se
200
In wich mȳ body is hid ful pryuyly
Do thilke carte a reste boldely
Myn gold causede myn mordere certeyn
And tolde hȳ euery poynt how he was slayn
With a wol pitous face pale of hewe
205
And truste weel this drē he fond ful trewe
For on the morwe as sone as it was day
To his felawe he tok te nexte way
And whan that he cam to his oxis stalle
Aftyr his felawe he be gan to calle
210
¶ The hosteleer answerde hȳ a non
And seyde sere ȝore felawe is a goon
As sone as day he wente out of the toū
This man gan fallyn in suspecioū
Remēbrynge hȳ on the dremys that he mette
215
And forth he goth no lengere wolde he lette
Vn to the westgate / of the toū & fond
A dong carte wente as it weere to dunge lond
That was a rayed in that same wyse
As ȝe han herd the dede man deuyse
220
And with an hardy herte he gan to crye
Vengeaūce & Iustise of this felonye
Myn felawe morderede is this same nyght
And in this carte heere he lyth gapȳge vp ryght
I crye out on the mynystris quod he
225
That schulde kepe & rewele this cete
Harrowe allas here lyth mȳ felawe slayn
What schulde I moore vnto this tale sayn
The peple out sterte & caste the carte to groūde
And in the myddyl of the donge they foūde