The Nun's Priest's Tale
Folio 366v
4 of 14 folios
Thow that he bad no dremys for to dreede
155
By god men may in olde bokis rede
Of manye a man moore of autorite
Thā euere catoū was so mote I the
That al the reuers seyn of his sentence
And han weel foūdyn by experience
160
That dremys been signyficacioūnys
As wel of ioye as of tribulacioūnys
That folk enduryn in this lyf present
Theere nedyth of this makyn non argument
The verray preue schewith it in dede
165
¶ Some of the gretteste autourys as men reede
Seyth thus that to felawys wente
On pilgrymage with a ful good ente
And happede so they comȳ in a toū
Where as theere was swich a cōgregacioū
170
Of peple & ek so streyt of herbigage
That they ne foūde as meche as a cotage
In whiche they myghe bothe I loggede be
Wherefore they musten of necescite
As for that nyght departȳ cūpaynye
175
And eche of hē goth to his ostellerye
And tok his logyng as it wolde falle
That on of hē was logit in a stalle
Fer in a ȝerd with oxin of the plough
That othir man was logid weel I nough
180
As was his auenture / or his fortune
That vs gouernyth alle as in comune
And so be fel that longe er it was day
This man mette in his bed there as he lay
How that his felawe gan vp on hym calle
185
And seyde allas for in an oxis stalle
This nyght I schal been morderid there I lye
Now help me deere brotyr er I deye
In alle haste come to me he seyde
This man out of his slep for fer abreyde
190
And whā that he was wakenede of his slep
He turnede hȳ & tok of this no keep