The Miller's Tale
Folio 183v
15 of 17 folios
Ȝa certis lēman quod þis absalon
Thāne mak þõ redi quod sche I come a non
535
This Absalon sette hȳ doun on hese kneis
And seyde I am a lord at alle degreis
For aftyr this I hope þere comyth more
Leman thȳ grace & swete bryd þyn ore
The wyndowe sche ondoth & that in haste
540
Haue don quod sche come of & sped þõ faste
Lest that thyn neyheboris þõ asspye
This absalon gan wype his mouth ful drye
Derk was the nyght as pouche or as the cole
And out at the wȳdowe sche putte here ars hole
545
And absalon fel neyþer bet noþer wers
But wt hese mouth he kyste here nakede ars
Ful sauorly er he were war of this
A bakke he styrte & thouthe it was a mys
For wel he wiste a woman hadde no berd
550
He felte a thyng al row & long I heryd
And seyde fy allas what haue I do
Te he quod sche & claptte here wyndowe to
And absalon goth forth a sory pas
A berd a berd quod hynde Nicholas
555
Bi goddis corpes this goth fayre & wel
This sely absalon herde euerydel
And on his lippe he gan for angyr bite
And to hȳ self he seyde I schal þõ quyte
Who rubbyth now ho frotyth now hese lippis
560
W dust wt sond wt straw wt cloth wt schippis
But absolon þt seyth ful ofte allas
Myn soule be take I onto saternas
But me were betere þan al this toun quod he
Of þis dispyt a wrokyn for to be
565
Allas quod he allas why ne hadde I bleynt
Hese hote loue was cold & al I queynt
For frō that tyme that he hadde kyst his Ers
Of paramor he sette not a kres