The Knight's Tale
Folio 146r
3 of 60 folios
And frosscher than þe may with flourys newe
I not whiche was fynere of hem too
Er it were day as was here wone to do
Sche was a resin & al redy dyȝt
185
The sesyn prekyth euery gentyl herte
And makyth it out of hese slep to sterte
And seyth a rys & do þyn obseruaūce
This makith emalie to haue remēbraūce
To don honure to may & for to ryse
190
I cloþed wasxx sche fresch for to deuyse
Here ȝelwe her was broyded in a tresse
Be hȳde here bak a ȝerde long I gesse
And in the gardyn at the sūne vp riste
Sche walkyth vp & doū & as here lyst
195
Sche gaderith flouris party white & rede
To make a suptyl garlond for here hede
And as an aūgel heueneliche sche song
The grete tour that was so thikke & strong
Whiche of the castel was the chef donioun
200
There as the knyȝtis weryn In presoū
Of whiche I tolde ȝow & telle schal
As euene ioynande to the castel wal
There as this emale hadde here pleying
Bryȝt was the sūne & cler in that morweuyng
205
And palamoū þis woful presoner
As was hese wone by leue of hese gayler
Was resyn & romede in a chanbre an hey
In whiche he al the cete sey
And ek the gardyn ful of braūchis grene
210
There as this frosche Emelye the schene
Was in here walk & romede vp & doun
This sorweful louere this palamoun
Goth in the chābre romȳge to & fro
And to hȳselue cōpleynynge of hese wo