The Summoner's Tale
Folio 236r
3 of 14 folios
115
Now by ȝoure leue o deere maystyr quod sche
Schidith hȳ wel for seynte trynyte
He is as angery as a pissemyre
Thow that he haue al þt he cā desyre
Thow I hȳ wrye a nyȝt & make hȳ warm
120
And ouerhym leye myn leg oþer myn arm
He gronyth lik oure bor lyth in oure sty
Oþer disport ryȝt non of hȳ haue I
I may not plese hȳ in no manere cas
O Thomas Ie vous dy Thomas Thomas
125
This makyth þe feen\d/ þis muste ben a mendit
Ire is a thyng þt highe god defendit
And þerof wele I speke a word or two
Now maystir quod þe wyf er þan I go
What wele ȝe dyne I wele go þere aboute
130
Now dame quod he Ie vous dy sanz doute
Haue I nat of a capoū but þe lyuere
And of ȝoure softe bred xxx but a scheuere
And aftyr þt a rostede pigis hed
But þt I nolde no beste for me were ded
135
Thāne hadde I with ȝow homely suffysaūce
I am a man of lytyl sustenaūce
Myn spirit hath his fosterȳge in þe bible
The bodi is ay so redy & penible
To wake þt myn stomak is distroyed
140
I prey ȝow dame ȝe be nat a noyed
Thow I so frendely ȝow mȳ cōseyl schewe
By god I nolde nat telle it but a fewe
Now syre quod sche but on word er Ix go
Myn child is deed with inne these woukis too
145
Sone aftyr þt ȝe wētyn out of þis toū
His deth saw I be reuelacioū
Seyde þis frere at hom in oure dortour
I dar wel seyn þt er þt half an our
Aftyr his deth I saw hȳ bore to blysse
150
In myn auysioū god so me wisse
So dede oure sexteyn & oure fermorer
That hā ben trewe frerys fifty ȝer