The Franklin's Tale
Folio 288r
3 of 21 folios
That is be twyn an husbonde & his wyf
A ȝeer & more lastyth this blysful lyf
Tyl that the knyȝt of whō I spak of thus
100
That of kayrrud was clepid Arueragus
Schoop hȳ to goon & dwelle a ȝeer or tweyne
In Ingelond that clepid was or Breteyne
To seeke in armys worschepe & honour
For al his lust he sette in swich labour
105
And dwelte there too ȝeer the bok seyth thus
Now wele I stynte of this Arueragus
And speke I wele of dorigions his wyf
That louyth hire husbonde as hire lyf
For hyse absence wepith sche & sykyth
110
As doon these noble wyuys whā hē lykyth
Sche / mornyth / wakyth / waylyth / \fastith pleynyth/
That al this wyde world sche sette at nouȝt
Hire frendys whiche that knewe hyre heuy thouȝt
115
Confortȳ \here ī al/ that euere they may
They preche hire they telle hire nyght & day
That causeles sche sleth hyre selue allas
And euery confort possible in this cas
They don to hire with al here besynesse
120
Al for to make hire leue hire heuynesse
By proces as \ȝe/ knowyn euerichoon
Man may so longe grauȳ in a stoon
Tyl sū fygure ther in enpryntid be
So longe han they cōfortid tyl that sche
125
Resceyuede hath by hope & by resoū
Then prentyng of hire consolacyoū
Thorw whiche / al hire sorwe gan swage
Sche may not alwey duryn in swych rage
And ek Arueragë in al this care
130
Hath sent hire lettere hō of his weelfare
And that he hastely wele come a geyn
Or ellis hadde this sorwe hire herte slayn
Here freendis sawe hyre sorwe gan a slake
And preyede hire / on kneis for godis sake