The Summoner's Tale
Folio 128v
3 of 18 folios
I trowe þe deuyl putte it in his mynde
In ars metrik schal þer no man fynde
515
Biforn þis day of such a questioū
Who schulde make a demonstracioū
Þat euery man schulde haue y lik his part
Of a soū or of a sauour of a fart
O nyce proude cherl I schrewe his face
520
Lo sires quod þe lord wiþ harde gace
Who herde euer of such a þing er now /
To euery man ylike telle me how
It is a impossible it may not be
O nyce cherle god let him neuer þe
525
Þe rublyng of a fart and euery soun
Nys but of eyre reuellacioū
And þer wiþ wasteþ litel and litel a way
Þer is no man can deme by my fay
If þat it were departed equaly
530
What lo my cherle lo ȝit how schrewedely
Vnto my confessor to day he spak
I holde him certein a demoniak
Now eteþ ȝoure mete and leteþ him go pleye
Lete him go hange himself a deuelweye
535
Now stood þe lordes squier at þe bord
Þat karf here mete and herde word for word
Of alle þing of which I haue ȝou sayd
My lord quod he beþ not yuele payd
I couþe telle for a gowne cloþ
540
To ȝou sir frere so ȝe ben nat wroþ /
How þat þis fart scholde euene deled be
Among ȝour couent if it like me
Telle on quod þe lord and þou schalt haue anon
A gowne cloþ by god and by seint Ioħn
545
My lord quod he whan þat þe weder is faire
Wiþouten wynd or pertourbyng of ayre
Let bringe a cart whel heer in to þis halle
But loke þat he haue his spokes alle