The Squire's Tale
Folio 99r
2 of 19 folios
And louen noueleries of propre kynde
No gentilesse of blood may hem bynde
So ferde þis tercelet allas þe day
Though he were gentil born fressche and gay
615
And goodly for to seen and humble and fre
He saugh vpon a tyme a kyte flee
And sodeinly he loued þe kyte so
That aƚƚ his loue is clene fro me go
And haþ his trouþe falsed in þis wyse
620
Thus haþ þe kite my loue in hire seruise
And I am lorn wiþoute remedye
And wiþ þat word þis Faukoū gan to crye
And swouned eft in Canacees barm
Gret was þe sorwe for þe haukes harm
625
That Canacee and aƚƚ hire wōmen maade
They nyste how þey mighte þe fawkoū glade
But Canacee home bereþ hire in hire lappe
And softely in plastres gan hire wrappe
Ther as sche with hir beek haþ hurt hir selue
630
Now kan not Canace but herbes delue
Out of þe grounde and maken salues newe
Of herbes perciouses and fyn of hewe
To helen wiþ þe hauk fro day to nygħt
Sche doþ hir besynesse and aƚƚ hire mygħt
635
And by hire beddesheed sche made a muwe
And couered it with veluettes bluwe
In signe of trouþe þat is in wōmen seene
And aƚƚ wiþoute þe muwe is peynted greene
In which were peynted aƚƚ þese false fowles
640
As ben þise tydifs tercelettes and owles
Right for þe spyte were peynted hem bysyde
Pyes on hem for to crye and chyde
Thus leet I Canacee hire hawk keeping
I wole nomore as now speke of hire ryng
645
Til it come eft to purpos for to seyn
How þat þis Faukou gat hire loue ageyn