The Canon's Yeoman's Tale
Folio 181r
3 of 22 folios
Oure grounde litarge eek on þe porphirie
Of ech of þise of vnces a certayn
Nouȝt helpeþ vs oure labour is in vain
Ne eek oure spirites ascensioū
60
Ne eek oure matieres þat lyn al fixe a doū
Mowen in oure werkynge no þing vs auayle
For lost is aƚƚ oure labour and trauaile
And al þe cost on twenty deuele wey
Is lost also which we vpon it ley
65
Þer is also many anoþer þing
Þat is to oure crafte aperteynyng
Þougħ I by ordre hem here ne reherse can
By cause þat I am a lewed man
Ȝit wol I telle hem as þey come to mynde
70
Thougħ I ne kan nat sette hem in here kynde
As boole armonyak verdegres Boras
And sondry vesseles made of erþe and glas
Oure vrinales and oure descensories
Violes creseletes and sublimatories
75
Concurbites and Alembykes eeke
And oþer swiche deere ynougħ a leeke
Nat needeþ it to rehersen hem aƚƚ
Wateres Rubysynge and boles galle
Arsynek Sal armonyak and Brymstou
80
And herbes couþe I telle eek many oon
As Egrymoyne Valerian and lunarie
And oþer suche if þat me luste tarie
Oure laumpes brennyng boþe night and day
To bringe aboute oure craft if þat we may
85
Oure fornays eke of Calcynacioū
And of watres albyficacioū
Vnslekked lym chalk and glaire of an ey
Poudres dyers aisshes dong pisse and cley
Seryd pokettes Sal petre and vitriole
90
And diuerse fyres made of woode and cole
Salt tartre Alcaly and Salt perparat