The Tale of Gamelyn
Folio 64r
19 of 21 folios
And ser Ote his broþere fetterd ful faste
810
Tho went Adam oute as he were agaste
Adam seide to Gamelin & to his felawes aƚƚ
Sire Ote stant fetterd in þe mote haƚƚ
Ȝonge men seide Gamelin þis here ȝe alle
Howe ser Ote stant fetterd in þe mote halle
815
If god ȝife vs grace wele for to do
He schal it a bigge þat it brouht it þer to
Than seide Adam þat lokkes had hore
Cristes curs mot he haue þat him bonde so sore
And þou wilte Gamelin do after my rede
820
Þare is none in þe haƚƚ schal bere awaie his hede
Adam seide Gamelin we wil nouht do soo
We wil sle þe Giltif & late þe oþere goo
.I. wil into þe haƚƚ & wiþ þe Iustice speke
On hem þat ben Giltif .I. wil bene a wreke
825
Lat none scape att þe dore takeþ ȝonge men ȝeme
For .I. wil be Iustice þis daie domes to deme
God spede me þis daye att my newe werke
Adam Com þou wiþ me for þou schal be my clerke
His men Anseward him & bad him done his best
830
And if þou to vs haue nede þou schal finde vs preste
We wil stand wiþ þe while þat we maie dure
And bot we wirken manly paie vs non hire
Ȝonge men seide Gameline so mote .I. wel þe
As trusti a maister schal ȝe finde on me
835
Riht þere þe Iustice satte in þe haƚƚ
In went Gamelin amonge hem aƚƚ
Gamelin lete vnfetter his broþer oute of bende
Than seide seri Oke his broþer þat was hende
Thou haddest almost gamelin dwelled to longe
840
For þe quest is oute for me þat .I. scholde behonge
Broþer seide Gamelin so god gif me gode rest
Þis daie þei schal be hongede þat bene on þi queste
And þe Iustice boþe þt is þe Iugge man
And þe scherreue boþe þoruh him it be ganne
845
Than seide Gamelin to þe Iustice
Nowe is þi power done þou most nedes arise
Thou hast ȝeue domes þat bene yuel diht
.I. wil sitten in þi sete & dressen hem a riht
The Iustice satt stiƚƚ & rose nouht anone
850
And Gamelin cleue his cheke bone .