The Tale of Gamelyn
Folio 64v
20 of 21 folios
Gamelin toke him in his armes & no more spak
Bot þroue him ouer þe barre & his arme to brak
Dorst none to Gameline seie bot gode
For ferde of þe compaignie þat wiþ oute stode
855
Gamelin set him doune in þe Iustice sete
And sir Ote his broþer by him & Adam att his fete
Herke of bourde þat Gamelin dede
He þouht for to make hem riht sore adrede
¶ He lete fetter þe Iustice & his false broþer
860
And lete hem come to þe barre þe tone wiþ þe toþer
Tho Gamelin had þus done he no rest
To he had enquered who was on þe quost
For to demen his broþer sir Ote for to honge
Or he wiste whiche þei were he þouht ful longe
865
Bot as son as Gamelin wist where þei were
He dide hem euerychon fetter in fere
And bringe hem to þe barre & sett hem on rewe
Be my faiþe seide Iustice þe scherreue is a schrewe
Than seide Gamelin to þe Iustice
870
Thou hast ȝeue domes of þe werst assise
And þe .xij. sisours þat weren on þe queste
Thei schal ben an hanged þis daie so haue .I. goode reste
Than seide þe scherreue to ȝonge Gameline
Lorde .I. crie þe Mercye broþe art þou myne
875
Ther fore seide Gamelin haue þou goddes curs
For and þou were Meister ȝit .I. scholde haue wors
For to make schort tale & nouht to longe
He ordeyned him a queste of his men so stronge
The Iustice & þe scherreve boþ hongede hihe
880
To veyven wiþe þe ropes . & wiþ þe wynde drye
And þe .xij. sisours sorwe haue þei þat rekke
Aƚƚ þei were hanged fast be þe nekke
Thus endeþ þe false knyht wiþ his trecherie
That euer hade ladde his lif in falsnes & in folye
885
He was hongede xx be þe nekke . & nouht be þe purce
Þat was þe mede þat he had for his fader curs
Sire Ote was eldest & Gamelin was ȝinge
Wente wiþ here frendes & pesed wiþ þe kinge
Thei made pes wiþ þe kinge of þe best sise
890
The kinge louede wele ser Ote & maade him Iustice
And after þe kinge maade Gamelin boþe in est & weste
Chief Iustice of his fre forest .