The Tale of Gamelyn
Folio 63v
18 of 21 folios
765
If þat god almyhty holde me my lif & witte
.I. wil be þere redy whan þe Iustice sitte
Than seide ser Ote til gamelin god schelde þe fro schame
Com whan þou seest time & bringe vs oute of blame
¶ Gamelin went þo vnder wode rise
And fonde þere playinge men of prise
Tho was ȝonge Gamelin riht glad ynouhe
Whāne he fonde his men vnder woode bouhe
775
Gamelin & his men talken in fere
And þei had good Game here maister to here
His men tolden him of aventures þat þei had founde
And Gamelin hem tolde aȝein howe he was fast bounde
Whan Gamelin was outelawe he \hadde/ no cors
780
Ther was no man þat for him ferde þe wors
Bot Abbotes & priours & monke & chanone
On hem left he nouht whan he myht hem nome
While Gamelin & his men made merþes rive
The fals knyht his broþer yuel most he þriue
785
For he was fast aboute boþe daie & oþer
For to hire þe queste for to honge his broþer
¶ Gamelin stode vpon a daie & he behelde
Þe wode & þe schawes in þe wilde felde
He þouht on his broþer howe him behette
790
Þat he wolde be redy whan þe Iustice sette
He þouht wele þat he wolde wiþ oute delaie
Com afor þe Iustice to kepen his daye
And seide to his ȝonge men diht ȝowe ȝare
For whan þe Iustice sitte we mot be þare
795
For .I. am vnder borwe til þat .I. come
And my broþer for me to pison schal be nōme
Be seint Iame seide his ȝonge men & þou reede þerto
Ordeigne howe it schal be and it schal be do
While Gameline was cominge þer þe Iustice satt
800
The false knyht his broþe for ȝate he nouȝt þatt
To hire men on his queste to hangen his broþer
Þouhe þei had nouht þe tone he wolde haue þat oþere
Tho cam Gamelin fro vnder wode rise
And brouht wiþe him ȝonge men of pise
805
.I. se wele saide Gamelin þe Iustice is sette
Go a forne Adam & loke how it spette
Adam went in to þe haƚƚ & loke al aboute
He sawhe þere stand lordes grete & stoute