The Tale of Gamelyn
Folio 57r
5 of 21 folios
Gode man seide Gamelin wilt þou wele done
Hold myn hors while my man draweþ of my schone
And help my man to kepe my cloþes & in stede
210
And .I. wil in to þe place gone to loke if .I. mai spede
Be God seide þe frankelein it schal be wele done
.I. wil my self be þi man to drawen of þi schone
And wende þou in to þe place ihū crist þe spede
And drede nouȝt of þi cloþes ne of þi good stede
215
Barfor & vngert Gamelin cam inne
Aƚƚ þat were in þe place hede of him þei name
Howe he dorste auntre him on him to done his myht
That was so dowhti a champion in wrastelinge & in fiht
Vp stert þe Champion rapely anone
220
Toward ȝonge Gamelin he be gan to gone
And seide who his fader & who is þi sire
For soþe þou arte a grete fole þat þou com hire
Gamelione ansewarde þe champion þoo
Thow knewe wele my fader while he couþe goo
225
Whiles he was on live be seint Martine
Sire Ioħon of Boundes was his name & .I. Gamelyne
Felaw seide þe champion so mot .I. þriue
.I. knewe wele þi fader while he was on lyue
And þi selfe gamelyne .I. wil þat þou it here
230
While þoue were a ȝonge boye a muche schrewe þu were
Than seide Gamelyn & swore be cristes ore
Now .I. am alder wax þou schalt finde me a more
Be god seide þe champion welcom mot þu be
Come þou ones in myne honde schalt þou neuer þe
235
It was wele wiþ inne þe nyht & þe mone schone
Whan Gameline & þe champion to geder gonne gone
The champion kast tornes to Gamelin þat was prest
And Gamelin stode stil & bad him done his best
Than seide Gamelin to þe Champeoū
240
Thou ert fast aboute to bringe me doune
Nowe haue .I. prouede mony tornes of þine
Þou mot he seide sele on or tuo of myne
Gamelyn to þe champeon ȝed smartly anone
Of al þe turne þat he couþe he schewde him bot one
245
And kest on þe left side þat þre ribbes to brake
And þere to his one harme þat ȝaf a grete crake
Than seide Gamely smertly a none
Schal it be hold for cast or elles for none .