The Tale of Gamelyn
Folio 56v
4 of 21 folios
165
The knyht þouhte on tresoū & Gamelin þouht none
And went & kissed his broþer and whan þei weren att one
Alas ȝonge Gamelyne no þinge he ne wiste
Wiþ suche false treson his broþer him kyst
Lysten & lyþes & holdeþ ȝoure tonge .
170
And ȝe schal here talkeinge of Gamelin þe ȝonge
Ther was þere beside cride a wrastlinge
And þer for þere was sette a rame & a ringe
And Gamelyn was in wil to wende þerto
For to prouen his myht what he couþe do
175
Broþere seide Gameline be seint Richere
Thou moste lene me to nyht a litel coursere
Þat is frische to þe spores on for to ride
.I. moste on an herande alitel here be side
Be god seide his brþer of stedes in my stal
180
Go & chese þe þe best & spare none of al
Of stedes or of coauseres þat stoden hem be side
And tel me good broþer wheder þou wilt ride
Here be side broþer is cried a warstelinge
And þer for schal be sett a ram & a rynge
185
Meche worschipe it were broþe to vs aƚƚ
Miht .I. þe rāme & þe ringe bringe home to þis halle
A stede þere was sadeled smerly & skete
Gamelin dide a paire of spores faire on his fete
He sete fote in þe sterep þe stede he be strode
190
And to warde þe wrastelinge þe ȝin childe rode
Tho Gamelin þe ȝonge was reden oute att þe gate
The false knyht his broþer lokked it after þate
And be souht Ihū crist þat is heuen kinge
He myht breke his neke in þat wrestlinge
195
As sone as Gamelin cam þer þis place was
He liht doune of his stede & stode on þe gras
And þere herde a frankelein walawaie singe
And be gan bitterly his hondes to wringe
Gode man seide Gamelin whi makes þou þis fare
200
Is þer noman þat maie ȝow helpen oute of þis care
Alas seide þis frankelein þat euer was .I. bore
For twey stalworþ soñes .I. wene þat .I. haue lore
A champion is in þe place þat me haþ wrowht sorwe
For he haþ sleine my twey soñes bot if god hem borwe
205
.I. wil ȝeue ten pounde be ihū crist & more
Wiþe þe nones .I. fand a man to halden him sore