The Tale of Gamelyn
Folio 56r
3 of 21 folios
Gamelyn was liht & þeder gan he lepe
And droue al his breþes men riht on an hepe
125
He loked as wilde lyon & leide on good wone
Tho his broþer sawhe þat þei be gan to gone
He fleyhe vpe in til a lofte & schotte þe dore fast
Thus Gamelyn wt his pestel made hem al a gast
Som for for Gamelines loue & sōme for his eye
130
Al þei drouhe be halues whan he be gan to pleye
What nowe seide Gamelin yuel mot ȝe þe
Wil ȝe be \ginne/ contik & so sone flye
Gamelin souht his broþere whider he was flowe
And sawh where þt he loked oute at a windowe
135
Broþer seide Gamelyn come a litel nere
And .I. wil teche a pleie att þe bokelere
His broþer him ansewarde & swore be seint Richere
While þe pestel is in þi honde .y. come þe no nere
Broþer .I. wil make þi pees .I. swere be goddes ore
140
Cast a waie þi Pestel & wraþþe þe nomore
.I. mot nede seide Gamelyne wraþþe me att ones
For þou wolde make þi men breke my bones
Ne had .I. had maine & miht in boþe myn armes
To fende hem fro me þei wolde haue done \me/ armes
145
Gamelin seide his broþere be þou nouht wroþe
For to seen þe haue harme me were riht loþe
.I. ne dide it nouht broþer but for afondeinge
For to loken if þoue were stronge & art so ȝynge
Come a doune þan to me & gaunt me my bone
150
Of þinge .I. wil þe axen & we schal sauhte sone
¶ Doune þan cam his broþer þat fikel was & fel
And was riht sore agast of þe pestel
He seide broþer Gameline ax me þi bone
And loke þou me blame bot .I. it guant þe sone
155
Than seide Gamelyin broþe ywis
And we schol bene att one þou most me gaunt þis
Aƚƚ þat my fader me bequaþe while he was on lyue
Þou most do me it haue if we schoƚƚ nouht striue
That schalt þou haue Gamelyn .I. swere be goddes ore
160
Al þat þi fader þe be quaþe þouhe þou woldest haue more
Thi londe þat heþ ley wele it schal be sowe
And þin house reised vpe þat ben leide so lowe
Thus seide þe knyht to Gameline be mowþe
And þouht of falsenes as he wele couþe