The Tale of Gamelyn
Folio 57v
6 of 21 folios
Be god saide þe champion weþer þat it be
250
He þat comes ones in þine hande schal he neuer þe
Than seide þe frankelein þat had his soū þere
Blissed be þu Gamelin þat euer þou borne were
The frankeleine seide to þe champion on him stode hī none eye
This is ȝonge Gamelyn þat tauht þe þis . pleie
255
Aȝeine anseward þe champion þat liked no þinge weƚƚ
He is alþer maister & his pleie is riht feƚƚ
Seþþe .I. wrasteled first it is go ȝore
Bot was neuer my lif handeled so sore
Gamelin stode in þe place a lone wiþ outen serk
260
And seide if þere be mo let hem come to werk
The Champiōn þat payned him to wirche so sore
It semeþ be his countenance þat he wil no more
For he handeled þe champion so wonderly sore
Two gentil men ȝemed þe place .
Cam to gamelin god ȝeue him gode gace
And seide to him do on þin hosen & þin schone
270
For soþe att þis time þe faire is done
And þan seid Gamelin so mot .I. wele fare
.I. haue nouȝt ȝit haluendel solde my ware
Tho seide þe Champion so brouke .I. my swere
He is a foole þat þer of byeþ þou selles it so dere
275
Tho seide þe frankelen þat was in muche care
Felawe he saide whi lakkes þou his ware
Be seinte Iame in Galeys þat mony man haþ souht
Ȝit it is to goodechepe þat þou hast bouht
Tho þat wardeins were of þe warstelinge
280
Come & brouht Gamelin þe Ram & þe ringe
And seide haue Gamelin þe ringe & þe Ram
For þe best warstelier þat euer here cam
Thus wanne Gamelin þe rāme & þe Ringe
And went wiþ muche Ioy home in þe Morneinge
285
¶ His Broþer seyhe where he came wiþ þe grete route
And bad schette þe gate & holde him wiþ oute
Te porter of his lorde was sore agast
And stert a none to þe gate & lokked it fast
Now liþeþ & listeneþ boþ ȝonge & olde
290
And ȝe schal her gamen of Gameline þe bolde
Gamelin cam to þe gate for to haue cōmen In
And þan was it schot fast wiþ a pin
Than seide Gamelin Portier vndo þe gate
For mony goode mannes son stonden þer ate