The Summoner's Tale
Folio 108v
4 of 15 folios
And spende here goode þere it resonable
Þere .I. sauhe oure dame \a/ where is sche
90
Ȝonde in þe ȝerde .I. trowe sche be
Seide þis man & sche wil come anone
Ey Maister welcome be ȝe be seint Ioħn
Seide þis wif howe fare ȝe hertly
Þe ferere riseþ vp ful curtasly
95
And her enbraseþ in his armes narwe
And kisseþ hir swete & chirkeþ as a sparowe
Wiþ his lippes ; dam qd he riht wele
As he þat is ȝoure seruant euerydele
I þonkede be god þat ȝow ȝaf soule & lif
100
Ȝit sawe .I. nouht to daie so faire a wif
In al þe cherche so god saue me
Ȝe god amend defautes sire qd sche
Algates welcom be ȝe be my faye
Graunt Merci dame þis haue .I. founde alweie
105
Bot of ȝoure grete goodenes beȝowre leue
.I. wolde praie ȝo\ue/ þat ȝe not ȝowe greue
.I. wil wiþ thomas speke a litel þrowe
Þis Curates buen ful necligent & slowe
To gropen tenderly a consciens
110
In schrift & in percheinge is my diligence
And stody in peters wordes & in poules
.I. walke & fische men soules
To ȝelden ihū criste his propre rent
To sprede his wordes .I. sett al myne entent
115
Now beȝoure leue oder ser qd sce
Chideþ him wele for god in trinite
He is as Angry as a pismyre
Ȝeihe þat he haue al þat he can desire
Þeihe .I. him wrye a nyht & make him warme
120
And ouer him laye my legge or myne Arme
He groneþ like owre bore groneinge in his stye
Oþer disport of him riht none haue .I.
.I. maie nouht plesen him in no maner caas
.Ieo vous die trerschier & bien amy o thomas
125
Þis makeþ þe fende it most bue amended
Ire is a þinge þat hihe god defended
And þere of wil .I. speke a worde or tuo
Nowe Maister qd þe wif ar þat .I. go
What wil ȝe dyne .I. wil go þere aboute