The Pardoner's Prologue & Tale
Folio 180r
5 of 15 folios
Thus hadde þes wriches tuo her endeinge
565
Thus ended buen þes homicides tuo .
And eke þe false empoysonere also
O cursede sinne ful of cursednesse
O traitoures homicideres o wikkednesse
O . glotony . o luxurye o hasardye
570
Þou blasphemer of crist wiþ velanye
And oþes grete of vsage & of pride
Alas mankinde howe may it betide
Ther to þine Creator whiche þat þe wrouht
And wiþ his percious blodde þe bouhte
575
Thowe ert so fals & so vnkinde alas
Nowe good men god for ȝeue ȝowe ȝoure trespas
And war ȝowe fro þe sinne of Auarice
Myne holy pardon may ȝow al warissche
So þat ȝe ofer nobles oþer sterlinges
580
Oþere elles siluer spones broches or ringes
Boweþ ȝowre heued vnder þis holy bulles
Cōmeþ vpe ȝe wives & offer ȝoure wolles
Ȝoure name .I. entre here in my rolle anone
In to þe blisse of heuen schole ȝe gone
585
.I. ȝowe assoile be myne hihe pouer
Ȝe þat wollen offere as clene and eke as clere
As ȝe weer borne & sires lo þus .I. perche
And ihū crist þat is oure sowles leche
So gaunt ȝowe his pardon to receyve
590
For þat is best .I. wil ȝowe nouht deceyve
Bot sires o worde forgat .I. in my tale
.I. haue Reliques & pardon in my male
As faire as any man of yngelonde
Whiche were me y ȝeue be þe popes honde
595
If any of ȝow wil of deuocione
Offerne & haue myne absolucione
Cōmeþ for anone & kneleþ adowne here
And ȝe schal haue my pardon þat is dere
Or elles takeþ pardon as ȝe wende
600
Aƚƚ newe & frishe att euery tounes ende
So þat ȝe offren alwei newe & newe
Nobles & pens whiche þat bien good & trewe
It is an honur to eueryche þat is here
Þat ȝe maye haue a suffisaunt pardonere
605
To assoile ȝow in contre as .I. ride
For aventures whiche þat mai be tide