The Miller's Tale
Folio 45v
13 of 17 folios
For he is wonte for timebre for to go
And dwellen att þe gange a daie or tuo
Or elles he is at his hous certeine
Wher þat he be .I. kann nouȝt soþely seine
485
This Absolon ful Ioly was & liht
And þouht . Now is time to wake al nyht
For sekurly .I. sawhe him nouhte steringe
Abouten his dore sen dai be gan to springe
So mote .I. Thriue .I. schal att þe Cokkes crowe
490
Ful piuely knokken att his wyndowe
Thatt stant ful lowe vpon his bowres waƚƚ
To Alison Nowe wiƚƚ .I. tellen aƚƚ
My loue longeinge for ȝit .I. schaƚƚ nouht mys
That att þe leste waye .I. schal hire kis
495
¶ Som manere comforþe schal .I. haue parfaie
My mouþe haþe yched aƚƚ þis longe daie
That a signe of kissinge att þe leste
Aƚƚ nyght me mete eke þat .I. was att a feste
There fore .I. wil go slepe an houre or tueye
500
And aƚƚ þe nyht þan wiƚƚ .I. wake & pleye
Whan þat þe first cokks haþ crowe anone
Vp riseþ þis Ioly louer Absolon
And him arrayeþ gaye & pointe deuise
Bot first he cheweþ greine & licorise
505
To smellen swote or he had kemped his here
Vnder his tonge a trewe loue he bere
For þer by wende he to be gracious
He romeþe to þe carpenteres house
And stiƚƚ he stant vnder þe schotte wyndowe
510
Vnto his breste it rauht . it was so lowe
An soft he couched wiþ a seme sowñe
Watt do ȝe hony combe swete Alisone
Mi faire birde Mi swete Sinamome
And wakeþ lemman myne & spekeþ wiþe me
515
Wel litel þinken ȝe vpon my woo
That for ȝoure loue .I. swete ar .I. go
No wonder is þouhe þat .I. swelt & swete
.I. morne as doþe lome after þe tete
.I. wis lēman .I. haue suche loue longeinge
520
That ilke a turtul trewe . is my Morneinge
.I. maye note eten no more þan amaide
Go fro þe window Iak fole sche seide