The Knight's Tale
Folio 29v
3 of 54 folios
That al her hote loue & desire
And al her bysy torment & hire fire
Be queynte or tornede in a noþeþer place
And if so be þou wilt nouht do me grace
1465
Or if my destany be schapede so
That .I. schal nedes haue one of þem tuo
As sende me him þat most desireþ me
Be holde goddes of clene chastite
The bitter teres þat oñ my cheke faƚƚ
1470
Sen þou art maiden & keper of vs aƚƚ
My maidenhede þou kepe & wele conserue
And wile .I. leue a maide .I. wil ȝowe serue
The fires berne vpon þe auter clere
While emely was þus in hir preiere
1475
Bot sodanly sche sawe a siht queynte
For rihte anone on of þe fires queynte
An quyked aȝeine & after þat anone
That oþer fire was queynte & al a gone
And as it queynte it maad a whistelynge
1480
As done þes wete brondes in her brenynge
And att þe brondes ende oute ran anone
As it were blodi dropes many one
For whiche so sore agaste was Emelye
That sche was nyhe mad & gan to crie
1485
For sche ne wist what it signified
Bot onely for þe fere þus haþ sche cried
And wepe þat Pite was to here
And þere wiþ aƚƚ Diane gan a pere
Wiþ bowe in honde riht as an hunteresse
1490
And seide douhter stinte þine heuinesse
Amonge þe goddes on hihe it is affermede
And be eterne worde wreten & confermede
Thou schalt be wedded vnto on\e/ of þoo
That haue for þe so muche care & woo
1495
Bot vnto whiche of hem .I. maie nouht teƚƚ
Fare wele for .I. ne maie no longer dweƚƚ
The fires whiche þat on myn auter berne
Schole ȝe declaren ar þat ȝe gon henne
¶ Thyne auentur of loue as in þis caas
1500
And wiþ þat worde þe Arwes in þe caas
Of þe goddes claterne fast & ringe
And forþe sche wente & made a vanyssinge