The Knight's Tale
Folio 38v
54 of 54 folios
That gentiƚƚ Palamon ȝoure owen knyht
That serueþ ȝowe wiþ wiƚƚ & herte & myht
2215
And euer haþe do seþ firste ȝe him knewe
That ȝe schaƚƚ of ȝowere grace vpon him rewe
And taken him for husbonde & for lorde
Lene me ȝowre honde for þis is oure accorde
Lat see nowe of ȝowre womanly pyte
2220
He is a kinges broþer sonne perde
And þouhe he weere a pouer bachellere
Sen he haþe serued ȝowe so mony a ȝere
And had for ȝowe so grete aduersite
It moste be considered leueþ me
2225
For gentil mercye oute to passen riht
Þan seide he þus to Palamon þe knyht
.I. trowe þere nedeþe litil se\r/monynge
To make ȝowe assente to þis þinge
Comeþ nere & takeþ ȝowre lady be þe honde
2230
Be twexen hem anone was maade þe bonde
Þat hiht matrimoigne or mariage
Be al þe counsel & þe Baronage
And wiþ al blis & melodye
Haþe Palamon y wedded Emelye
2235
An god þat haþe al þis werlde wrouht
Sende him his loue þat haþ it dere bouht
For nowe is Palamon in al his wele
Leueinge ī blis xx richesse & hele
And Emely him xx loueþ so tenterly
2240
And he hir seuiþ xx so gentilly
That þere no worde was hem be twene
Of Iolousy or any oþer tene
Thus Endeþ Palamon & Emelye
And god saue al þis faire compaignye
Incipit prologus Melendenarij
Whan þat þe knyht had þus . his tale y tolde
In al þe company nas þere ȝonge ne holde
That he ne seide it was noble storerye
And worþi for to drawen in memorie
5
And nameliche þe gentils euerychone
Owre oste louhe & swore so mot .I. gone
This goþe ariht vnboklede is þe male
Lat see nowe who schal tel a noþer tale