The Knight's Tale
Folio 14r
34 of 54 folios
And so be fel þat in þe caas þei founde
Thorghe girt mony a greuous blody wounde
Two ȝonge knyhtes liggeynge by & by .
Boþen in armes samen wrouht ful richely
155
Of whiche two Arcita hiht þe tone
And þat oþer knyhte hihte Palamone
Not fully whikke ne fulli dede þei were
Bot be her cote armres & by hire gere
The heraudes knew hem selfe in special
160
As þei þat weren of þe blode roial
Of Thebes & of sustren two yborne
Owte of þe caas peloures haþe hem torne
And haue hem caried softe vnto þe tente
Of Theus & he ful sone hem sente
165
Tho Athenes to dwellen in prisone
Perpetuely hem nold nouht raunson
¶ And whan þis worþi Duc had þus ydone
He toke his hoste & home he rideþ a none
Wiþ laurer Coroned as a conqueroure
170
And þere he leueþ in Ioy & in honoure
Terme of his lif what nedeþ wordes moo
And in a toure in Angwysse & in woo
Dwellen þis Palomon & eke Arcite
For euer more þer maie no golde hem qwyte
175
This passeþ ȝere be ȝere & daie be daie
Til it fel ones in a Morneinge of maie
Þat Emelye þat fairer was to sene
Than is þe lylye vpo his stalke grene
And fresscher þan þe maie wiþ floures newe
180
For wiþ þe rose coloure strofe hir hewe
.I. note whiche was feireste of hem two
Er it were daie as was hire wōne to do
Sche was aresen and al redi diht
For Maij wil haue no sloggardye on nyht
185
The seson Prikkeþ euery gentil hert
And makeþ it owte of his slepe to sterte .
And siþen arise an done may obseruaunce
This Makeþ Emelye to haue remembrance
To done honoure to maie & for to rise
190
I cloþed was sche Fresche for to devise
¶ Here ȝelowe here was browded in a tresse
Be hinde hire bake a ȝerde longe .I. gesse .