The Canon's Yeoman's Tale
Folio 161r
17 of 19 folios
55
Oure orpemēt & sublimed Mercurie
Oure grounde litage eke in þe perorforie
Of yche of þes vnces acerteine
Nouȝt helpeþ vs oure laboure is in veine
Ne eke owre spirites ascencion
60
Ne eke oure matiers þat lien al fix adoune
Mowe in oure werkeinge noþinge vs aveile
For lost is al oure laboure & traueile
And al þe cost in .xx. deuel waie
Is loste also whiche we on it leie
65
Þere is also mony anoþere þinge
Þat is to oure crafte or perteineinge
Þouhe .I. be order hem here ne reherse can
Because þat .I. am alewde man
Ȝit wil .I. tel hem al þei come to mynde
70
Þouhe .I. nekan sette hem in her kinde
As bole armonyac verte grece & borace
And sundere vessels maade of erþe & glasse
Oure Orinales & oure descensories
Viols cresletes & sublimatories
75
Cocurbites & alembekes eke
And oþer suche dere y nowhe aleke
Note nedeþ it to reherse hem al
Waters rubefiinge & boles gaƚƚ
Arcenyk sal armonyak & bromstone
80
And herbes couþe .I. tel eke many one
As egremoyne valeriane & lunarie
And oþer suche if þat me luste to tarye
Oure lampes berneinge boþe nyht & daie
To bringen aboute oure craft it þat we maie
85
Oure forneys eke of Calcinacione
And of waters albificacione
Vn slekked lyme chalke & gleire & of anaye
Pouders dules asshes donge pisse & cleie
Ceride poketes Sal peter & vitriol
90
And diuers fires maad of wode & cole
Sal tarter Alkaly & sal perperate
And combust matiers & coagulate
Cleye made wiþ hors here & oyle
Of tartre Alū glasse berme worte & Argoile
95
Resalgar & o þer matiers enbybeynge
And eke of oþer maters encorperinge